Varri masiv u zbulua në vitin 2002 nga policia lokale dhe Instituti i Personave të Zhdukur. Gropa ishte një ish-minierë qymyri dhe është mbi 100 metra e thellë. Aty u gjetën eshtrat e 53 personave të moshës 17 deri në 55 vjeç.

Viktimat ishin ish të burgosur nga kampet e paraburgimit në Ripac dhe Racic, si dhe gra dhe të moshuar nga fshati Ripac.

Vendndodhja tani është shënuar me një pllakë përkujtimore që përkujton 53 civilët që u vranë.

Sipas vendimeve të gjykatës, rreth 5,000 banorë të fshatrave Kulen-Vakuf, Orasac, Cukovo, Klisa dhe Ripac u dëbuan nga shtëpitë e tyre. Rreth 100 burra u dërguan në kampet e paraburgimit në Ripac dhe Racic dhe më pas u vranë.

Ish-luftëtari serb i Bosnjës Zoran Tadiç arriti një marrëveshje pranimi fajësie me prokurorinë kantonale në Bihac, duke pranuar se ai ishte i përfshirë në vrasjen e 18 civilëve, kryesisht gra, të moshuar dhe një vajzë adoleshente, në fshatin Orasac pranë Bihacit në vitin 1992. Pas vrasjeve, anëtarët e forcave serbe të Bosnjës grumbulluan kufomat dhe u vunë flakën.

Pasi pranoi fajësinë në vitin 2012 në këmbim të një dënimi prej 12 vjetësh burg, Tadiç ndihmoi policinë dhe prokurorët të gjenin trupat e civilëve të vrarë në gropën e Tihotinës, e cila është afër Orasacit.

Katër ish-luftëtarë të tjerë serbë të Bosnjës gjithashtu pranuan fajin. Gjykata kantonale e Bihacit dënoi Jovica Tadiç me 12 vjet burgim, Zoran Berga dhe Zeljko Babiç me 11 vjet burg dhe Goran Mihajloviç me dhjetë vjet e gjysmë burg.

Në vitin 2014, ish-ushtari serb i Bosnjës, Djuro Tadiç, u dënua me 10 vjet burg në Gjykatën Speciale të Beogradit. Dy burra të cilët ishin gjithashtu të akuzuar në këtë rast, Gojko Djuriç dhe Slobodan Djuriç, vdiqën para vendimit, ndërsa një burrë tjetër që pretendohej se kishte marrë pjesë në vrasje, Cvetko Tadiç, u arratis.